Pastel de pescada e salmón

Ingredientes:

400 g de salmón afumado, 200 g de gambas, 300 g de pescada, 1 pataca mediana, unha presa de olivas, unha presa de cogombriños en vinagre, maionesa (mellor caseira), 1 ovo, aceite de oliva virxe extra.

Elaboración:

1. Utilizar un molde (ou calquera recipiente alto) de aproximadamente 18 cm de diámetro.
2. Untar as paredes do molde con aceite.
3. Cortar un anaco de film que cubra todo o interior do molde e que saia polos bordos. Untar de aceite o anaco de film e forrar o molde con el.
4. Cubrir o interior do molde coas talladas de salmón afumado, que quede todo ben cuberto e sobresaíndo polos bordos para logo pechar o pastel.
5. Cocer a pataca cun pouquiño de sal, deixala arrefriar e cortala en láminas.
6. Cocer a pescada cun poquiño de sal, deixala arrefriar e esnaquizala.
7. Cocer as gambas cun pouquiño de sal, deixalas arrefriar, pelalas e cortalas en dous ou tres anacos.
8. Cocer o ovo, deixalo arrefriar e picalo moi picadiño.
9. Picar as olivas e os cogombriños en vinagre.
10. Mesturar todos os ingredientes, agás a pataca, engadir unhas dúas ou tres culleres de maionesa.
11. Poñer no fondo do molde unha capa de patacas e engadir un pouquiño de aceite.
12. Engadir a mestura dos demais ingredientes por enriba da pataca.
13. Pechar o pastel co salmón que quedou colgando polos bordos, se é necesario, para que quede ben pechado, poñer algunha tallada máis de salmón.
14. Deixar repousando na neveira.
15. Poñer o prato para servir enriba do molde e darlle a volta, retirar o film e decorar.

Recollida en Webos fritos.

Dificultade: Media.

Tempo aproximado: 45 minutos.